Dispatser gipusil sa agtang

CEBU, Philippines - Kritikal ang kahimtang sa usa ka dispatser human kini giagtang sa pagpusil sa iyang kauban sa Urdaneta Street, Tinago, Dakbayan sa Sugbo pasado alas 2 sa nakalabay nga hapon.

Ang biktima giila nga si Danilo Obaob, 30, adunay kapuyo nga taga Barangay San Roque, samtang ang suspek mao si Jomel Sarveda, hingkod ug silingan ra sab sa biktima.

Matud ni Police Officer 3 Winston Ybañez, imbestigador sa homicide section sa Cebu City Police Office, nga personal nga bikil ang ilang nakita nga motibo sa krimen.

Sumala pa ni Ybañez nga ang kapuyo sa biktima nitug-an nga una niya nga nakita nga nagkalalis ang biktima ug ang suspek sa wala pa nahitabo ang pagpamusil.

Human sa panaglalis sa duha, nilakaw ang suspek apan kini nibalik nga nagdala na og armas dayon pusil sa agtang sa biktima. Dali sab nga nisibat si Sarveda human sa pagpamusil samtang gidala sa Cebu City Medical Center (CCMC) si Obaob nga anaa sa talandugon nga kahimtang. (BANAT NEWS)