“Good bacteria” gi-spray sa landfill

CEBU, Philippines - Kagahapon mao ang ikaduhang adlaw nga ang Department of Public Services (DPS) nag-spray og matud pa nila “good bacteria” sa nagtipun-og nga basura sa Inayawan Sanitary Landfill aron makatabang nga temporaryong mawala ang kabaho niini nga gireklamo sa kadaghanan.

Nagkanayon si Roberto “Bob” Cabarrubias pangulo sa DPS sa dili pa sila mag-spray bas-on una nila ang mga basura sanglit mas epektibo kini.

Ang good bacteria nga gigamit karon sa DPS gitawag kini og Microbial Inoculant ug ang pamaagi niini ihumol ang produkto sa tubig sulod sa unom ngadto na sa 12 ka oras ayha pa gamiton.

Sigon ni Cabarrubias sukad nga migamit sila sa microbial inoculant nabantayan nga dili na grabe kabaho ang Inayawan Landfill itandi kaniadto nga wala pay kemikal nga gibutang.

Nag-emergency purchase ang siyudad sa maong produkto dihang nipahigayon og demo ang CHC Agritech ug nakita sa siyudad nga epektibo gyud pangontra sa baho sa basura.

Dili mominus sa 300 ka pakete sa microbial inoculant ang gipalit sa siyudad nga nagkantidad og kapin sa P400 mil nga molungtad hangtod na sa 15 ka adlaw.

Matud ni Cabarrubias ang gigamit nila pagtabon sa mga basura mao ang garden soil nga kun mag-uwan mahimong lapok ug dili  maagian sa mga  trak.

Nasayran usab nga nangaguba ang tulo ka bulldozers sa DPS ug hinuwaman lang gikan sa Cebu Contractors Association ang usa ka bulldozer nga maoy gigamit karon pagpatag sa mga basura.

Si Joel Rafer, Product Consultant ug Developer sa Microbial Inoculant sa CHC Agritech miingon ang ilang produkto dili lang sa landfill mahimong gamiton tungod kay magamit usab kini sa water waste management ug mga piggery ug poultry farms.

Matud niya, naengganyo siya paghimo og demonstrasyon bahin sa ilang produkto human niini mabasa sa mga pamantalaan ang balita kalabot sa problema sa Inayawan Sanitary Landfill.

Samtang si Arlen Cabiles kinsa dugay na nga manguykuyay og basura sa lugar nabalaka nga kun sirad-an kini og balik mawad-an na usab sila og panginabuhian. (BANAT NEWS)