300 EJKs susihon
CEBU, Philippines - Ang Commission on Human Rights gihatagan og 60 ka adlaw aron mag-imbestigar bahin sa mga nahitabong extra-judicial killings (EJKs) dinhi sa Central Visayas.
Kini ang gitug-an ni Leo Villarino ang Chief Investigator sa CHR-7 nga nahinabi sa Banat News.
Matud pa ni Villarino, matag kaso nga ilang imbestigahan gihatagan sila og usa ka tuig sa pag-imbestigar, apan karon kinahanglan mahuman kini sulod sa 60.
Sumala pa ni Villarino, gikan niadtong Mayo 22 hangtod kagahapon aduna na silay natala nga 300 ka mga EJK cases nga ginuntan base sa mga report sa media, apan walo pa lang ang niduol sa ilang buhatan.
Lakip na niini ang kaso ni Gerald Sedeno nga giingong gipatay sa mga polis.
Si Villarino, nipadayag nga bisan og hamubo lang ang adlaw nga gihatag sa Task Force EJK ilang buhaton ilang trabaho bisan kulang sila sa manpower.
Ang CHR-7 aduna lamang upat ka imbestigador ug tulo ka Legal Team nga maoy mosusi sa ilang imbestigasyon, hinuon karong buwan sa Oktubre gipahibalo niini nga pun-an ang ilang mga sakop. (BANAT NEWS)
- Latest
