Pag-umangkon ni Tata Negro gipatay
CEBU, Philippines - Namatay sulod sa tambalanan ang pag-umangkong babaye ni anhing Crisostomo “Tata Negro” Llaguno human kini gipusil samtang sakay sa iyang motorsiklo kauban ang iyang hinigugma diha sa Brgy.Duljo-Fatima, Dakbayan sa Sugbo kagahapon sa hapon.
Ang biktima giila nga si Analou Llaguno, 30, nga taga B. Rodriguez ning Dakbayan sa Sugbo. Si Tata Negro kinsa kandidato pagka-konsehal sa siyudad sa Sugbo gipasanginlan kaniadto nga nalambigit sa ilegal nga drugas, siya gipatay atol sa campaign sorties niini dinhi sa Cebu City.
Matud pa ni Police Officer 3 Enrico Quirante sa Homicide Section sa Cebu City Police Office nga nahinabi sa Banat News nag-angkas ang biktima sa uyab niini nga maoy nimaneho sa scooter.
Apan pag-abot sa maong dapit kalit lang may mitapad nga usa ka motorsiklo nga adunay sakay nga tulo ka mga lalaki ug ang usa sa mga backrider ang mipusil sa biktima.
Daling mihunong ang uyab niini ug gigakos ang dalaga apan mihunong usab ang motorsiklo sa mga mamumuno ug gitiwasan ang biktima hinungdan nga midagan na lang kini.
Sigun pa ni Quirante nakaangkon og samad pinusilan sa ulo ang biktima ug nakabsan sa iyang kinabuhi sud sa tambalanan.
Daku ang pagduda ni Quirante nga si Llaguno ra gayod ang target sa mga mamumuno kay wala hilabti ang uyab niini. Hangtod karon blangko pa ang kapulisan sa motibo sa maong hitabo ug nagpadayon pa ang ilang pagsubay sa insidente. (BANAT NEWS)
- Latest