Jailguard nga apil sa ‘drug watchlist’ gitumba
CEBU, Philippines - Natusak-tusak sa bala ang lawas ug nakabsan sa kinabuhi ang usa ka jail guard nga giingong nalakip sa drug watchlist sa kapolisan sa Danao samtang kini padung sa trabaho.
Ang biktima giila nga si Jail Officer 2 Celso Montalba, 48, taga Brgy. Sabang, Danao City.
Sumala pa sa imbestigasyon, gikan naghatud sa iyang anak didto sa eskuylahan si Montalba ug padung na sa iyang trabahoan apan pag-abot niya sa hilit nga bahin sa Sitio San Antonio, Brgy. Guinsay gipaulanan kini og bala sa wala mailhing lalaking nagmotor.
Ang hepe sa Danao City Police nga si Sr. Insp. Alejandro Batobalonos nga nahinabi sa Banat News miingon nga si Montalba anaa sa ilang “drug watchlist” ug usa siya sa gikonsiderar nila nga “high value target” nga ilang gipanid-an.
Wa pay kasayoran ang kapolisan kun kinsa ang mamumuno ni Montalba, apan nagtuo siya nga nasuhito sa “pattern” sa mga lakaw sa maong jailguard ang gunman.
Duha ka samad pinusilan sa agtang, duha sa dughan ug tulo sa bukton ang naangkon sa biktima nga nakaingon sa iyang kamatayon.
Nakuha diha sa crime scene ang pito ka basiyo sa bala sa .45 caliber pistol, ug giingong adunay nakuha ang mga polis nga usa ka putos nga gituohang shabu nga mitimbang og 10 gramos nga mikantidad og P121, 540.
Ang gunman nga giingong nagtaptap sa nawong nagbilin og papel nga adunay nakasulat nga “BJMP PUSHER AKO, AYAW KO NINYO SUNDA IKAW SUNOD.”
Dako ang pagduda ni Batobalonos nga bikil sa grupo sa mga kauban sa biktima nga naglihok sa drugas ang hinungdan niini, apan ilaha usab subayon ang uban pang posibleng anggulo. (BANAT NEWS)
- Latest