International Port tukoron sa Consolacion

CEBU, Philippines - Sugdan na ang pagpatukod sa Cebu International Container and Bulk Terminal diha sa lungsod sa Consolacion human gipirmahan kagahapon ang bilyones pesos joint-venture agreement (JVA) tali sa lungsod ug sa developer niini.

Si Consolacion Mayor Teresa Alegado maoy nipirma sa maong kasabutan tali sa Mega Harbour Port Development Inc. nga mobubo og P16.450 bilyones aron ma-develop ang giplanuhan nga reclamation project sa maong lungsod nga makapausab sa landscape sa usa sa mga first class municipality sa lalawigan sa Sugbo.

"It is not impossible for a small local government unit like Consolacion will be entering into this big project," matud pa ni Alegado sa wa pa niya pirmahe ang public-private partnership contract nga adunay proponent nga port development.

Sa wala pa mahitabo ang maong pinirmahay, giangkon ni Alegado nga niagi pa og makuti nga mga pagtuon ug pagtuki ang maong proyekto gikan sa nagkadaiyang ahensiya. Ang P16.459 bilyones ihatag sa Cebu Port Authority (CPA) human ang municipal council nipasar og ordinansa nga nagtugot kang Alegado nga mopirma sa joint venture agreement.

Si Mega Harbour Chairman Reghis Romero II niingon nga lakip sa maong proyekto mao ang pag-reclaim sa 85 ka ektaryang luna sa kabaybayonan sa Brgy. Tayud. Aduna say himuon nga berthing facility nga adunay gitas-on nga 1,200 metros nga posibleng makapadugang sa kapasidad sa Sugbo nga makadawat og port calls gikan sa mga international vessels.

Dugang ni Romero nga malakip unya sa phase 2 mao ang 50-hectare nga commercial complex, road networks ug utilities.

Ubos sa maong kasabutan, tapuson kini sulod sa duha ka tuig ug ang development works alang sa phase 2 mahuman sud sa usa ka tuig ug tunga.

Gumikan sa maong kalambuan, matud ni 6th District Representative Jonas Cortes, iya nang lihukon ang proposal nga himuong siyudad ang Consolacion kay makuha naman niini ang gi-require nga 100 square kilometers nga total land area kun mahuman na ang reclamation project alang sa Cebu International Container and Bulk Terminal.

Nasayran nga bisan og aduna lang kini 37 square kilometers sa kinatibuk-an land area ang maong lungsod padayon ang paglambo sa ekonomiya niini. Gikan sa report sa The Freeman (BANAT NEWS)