Anak gitigbas sa 70-anyos nga amahan

CEBU, Philippines - Nitahan sa kapolisan sa Lungsod sa Malabuyoc ang 70-anyos nga amahan nga nitigbas sa iyang 32-anyos nga anak sa Sitio Palaypay, Barangay Tolosa niadtong nakalabay nga gabii.

Ang amahan giila nga si Pedro Rivas, mag-uuma nga nagpuyo sa maong dapit.

Sa imbestigasyon nasayran nga si Pedro ug iyang anak nga si Jaybe gikan nitambong og birthday party.

Sa pagpamauli, giingong gihagit sa anak og sukmagay ang iyang amahan ug gisundan kini paingon sa balay.

Dali nga nikuha og sundang ang amahan ug gitigbas ang iyang anak sa nagkadaiyang parte sa lawas.

Si Jaybe ang dali nga gidala sa Reinhard Wirtgen Hospital sa Alegria apan gibalhin sa Vicente Sotto Memorial Medical Center.

Matud ni Police Officer 1 Rowel Borlas nga alas 9 sa buntag kagahapon nakagawas ra sab sa prisohan ang amahan gumikan kay ang biktima dili interesado nga mopasaka og kaso.

Mismo ang asawa sa biktima ang nipakita sa buhatan sa kapolisan ug niingon nga dili na sila moreklamo sa hitabo apan gusto lang nila nga matabangan sa amahan sa gasto sa hospital.

Nagduda si Borlas nga lagmit may karaang bikil sa amahan ug anak hinungdan sa kagubot ilabi na nga ang duha pulos nakainom. (BANAT NEWS)