Gipusil patay sa iyang kaila
CEBU, Philippines - Gipusil patay ang usa ka factory worker sa iya ra sab nga kaila sa White Road, Inayawan, Dakbayan sa Sugbo kagahapon sa buntag.
Ang nakalas mao si Arnolfo Gadiano, 48, minyo, taga Abasolo Compound, samtang ang suspek mao si Benjamin Abellana Jr. alyas Abe, 35, taga Lower Torre, Inayawan.
Matud ni Senior Police Officer 4 Roger Nedamo sa Pardo Police Station nga naglakaw lang ang biktima dihang kalit gipusil sa suspek.
Duha ka samad pinusilan ang naangkon ni Gadiano apan walay kabhang sa bala nga nakuha sa kapolisan sa crime scene.
Dugang pa ni Nedamo nga padayon pa nilang gisubay kung asa si Abellana kinsa nakasibat samtang personal nga bangi ang usa sa ilang gitutukan nga motibo apan matud sa mga anak ni Gadiano nga laing tawo ang gikalalis sa ilang amahan. (BANAT NEWS)
- Latest
