Pardo Police Station gikawatan og kuryente

CEBU, Philippines - Nakumpirmar na ni Cebu City Councilor Dave Tumulak nga adunay pagpangawat sa kuryente sa Pardo Police Station human sa pagsusi sa Visayan Electric Company (VECO).

 Kahinumduman nga niadtong Lunes, personal nga giadto ni Tumulak ang maong estasyonan aron subayon kun nganong niabot og P34 mil ang bill sa ilang kuryente diin ang siyudad maoy nagbayad.

Nagduda kini nga adunay pagpangawat sa kuryente maong gipasusi niya sa VECO.

 Sa luyo sa maong presinto, ang Pardo Public Market ug nasuta nga 5 ka tindahan ang giingong ni-tap og kuryente sa estasyonan. Tungod niini, ang public administrator sa maong merkado uban ang VECO nihimo og imbestigasyon ug giusab nila ang linya aron dili na sayon kab-oton human nakita nga adunay saksakanan ug plangka nga gibutang.

 Wala masayod ang presinto niini kay dili  nila madawat ang resibo inig bayad sa bill kay deretso kini sa General Services Office. Giawhag ni Tumulak ang tanang police stations ug ang mga hepe niini sa pagsusi sa linya sa ilang kuryente kay insulto kini  kanila kay sila na hinuon ang gikawatan. Ang VECO nipasalig nga ilang dakpon ug kasuhan kadtong mga tawo nga mapamatud-ang nangawat og kuryente.

 Samtang adunay pamaagi nga gi-endorso si Mayor Tomas Osmeña aron malikayan ang hitabo, kini mao ang pagbutang sa kable sa ibabaw aron sayon ra kining subayon ug angay nga duha ka plangka ang ibutang; plangka alang sa city government ug plangka alang sa private stall holders. Ang mahitabo niini, sa dili matag-an nga panahon, pagngon ang plangka sa mga private stall holders ug kun adunay makita nga adunay kuryente, mahibaw-an nga adunay nahitabong pagpangawat sa kuryente. (BANAT NEWS)