BHWs patabangon sa rehab program
CEBU, Philippines - Nagtinguha ang Provincial Health Office nga patabangon ang mga barangay health workers sa rehabilitation program sa mga nisurender nga mga tiggamitan og ginadiling drugas.
Matud ni Dr. Ismael Niño Pastor, pangulo sa public health sa PHO, nga nakig-alayon sila karon sa mga barangay health workers ingon man mga social welfare personnel sa nagkadaiyang lungsod ug dakbayan aron daghan ang makatabang og assess sa mga surrenderees.
Adunay 8,000 ka BHWs sa Probinsiya sa Sugbo ingon man 6,000 ka midwives nga magsilbing force multiplier nga motabang sa public health approach nga pamaagi sa rehabilitation. Wala pay labot niini ang mga nurses ug doctors sa mga provincial ug district hospitals ingon man ang 67 ka municipal health officers sa tibuok probinsya.
Apan gitataw ni Pastor nga bisan pa man nga daghan ang personnel, hagit gihapon kini kanila sanglit ang maong mga empleyado aduna nay mga giatiman nga laing pasyente.
Matud ni Pastor nga ang BHWs ang unang mo-assess sa mga surrenderees dayon sa mga municipal o city health officers alang sa dugang assessment kung angay ba sa treatment ang usa ka surrenderee o kinahanglan gyud kini ipaubos sa admission.
Unang nibutyag si Pastor nga moabot na ngadto sa 40,000 ang mga nisurender sa tibuok lalawigan diin 10 porsiyento niini ang kinahanglang ipaubos gyud og in-house rehabilitation. (BANAT NEWS)
- Latest
