Retiradong Navy nag-pusher

CEBU, Philippines - Nagtingkagol sa selda sa Pardo Police Station ang usa ka retiradong sakop sa Philippine Navy human nadakpan sa buy-bust operation sa Poblacion Pardo, Dakbayan sa Sugbo pasado alas 11 sa nakalabay nga gabii.

Ang dinakpan naila nga si Jerry Loseo, 53, minyo ug temporaryong   nagpuyo sa maong dapit.

Ang hepe sa Pardo Police Station nga si Senior Insp. Robert Lucernas niingon nga niadtong unang semana pa lang ila na nga gipaubos sa Oplan Tukhang ang suspek apan kini wala gyud nitahan.

Nakuha gikan sa suspek ang duha ka pakete sa gituohang shabu ug upat ka stick sa marijuana.

Matud ni Lucernas nga shabu ug marijuana ang gibaligya ni Loseo samtang dunay dapit sa iyang gipuy-an ang gihimong suyopanan.

Nunot niini si Lucernas niingon nga hayan maputol ang pensiyon ni Loseo nga tag P15 mil matag buwan tungod sa kasong atubangon niini.

2 minors na-rescue

Na-rescue ang duha ka babaye nga minor de edad sa mga kamot sa drug pusher sa Mahayahay, Barangay Cansojong, Dakbayan sa Talisay niadtong Miyerkules sa hapon.

Ang kapolisan ug Philippine Drug Enforcement Agency niresponde sa taho kalabot sa ilegal nga kalihukan sa usa ka Dondel Panilagao, 30-anyos, hinungdan sa pagkasikop niini pinaagi sa buy-bust operation.

Nakuhaan og upat ka medium pack sa shabu si Panilagao lakip na ang tulo ka tag P100 nga buy-bust money ug laing P500 nga gidudahang halin sa ilegal nga drugas.

Ang mga operatiba ang nakahigayon sab sa pag-rescue sa duha ka babaye nga minor de edad nga nag-edad og 15 ug 16-anyos sa panimaye ni Panilagao.

Gi-turnover sa Department of Social Welfare and Development ang mga minor de edad samtang si Panilagao ang gibalhug sa karsel samtang nagpaabot nga pasakaan og kaso.

Hitman-pusher

Nadakpan ang notadong tulisan ug gun-for-hire ug nag-sideline sab sa pagpamaligya og ginadiling drugas sa Bahadas, Tabunok, Dakbayan sa Talisay kagahapon sa kadlawon.

Ang dinakpan nailhan nga si Mansueto Rosco alyas Edot, hingkod nga nagpuyo sa nahisgutang lugar.

 Nakuhaan si Edot og pito ka gagmay nga pakete sa shabu, usa ka .45 nga armas nga adunay unom ka bala, lima ka wig ug maskara sa ungo.

Ang mga nakuhang drugas mokantidad og P4,484. Sila si Supt. Aileen Recla nagduda nga kadtong mga wig ug maskara ang gamiton ni Edot sa iyang pagpanulis lakip na kung adunay mokuha sa iyang serbisyo sa pagpatay sa usa ka tawo.

 Magsuong pusher

Nabalhug sa detention cell sa kapolisan ang managsuon nga nadakpan sa buy-bust operation sa Cogon, Barangay Poblacion, Lungsod sa Liloan alas 4 pasado sa niaging   hapon.

Si Police Officer 3 Niel Ryan Talle sa Liloan Police Station niila sa managsuon nga sila si Jame Andrian Camay Tulo, 37, ug Patrick Camay Talle, 28, taga Barangay San Vicente.

Si James nakuhaan og walo ka pakete sa gituohang shabu ug ang manghud nga si Patrick ang nakuhaan usab og duha ka medium size sa gituohang shabu ug P200 nga marked money.

Matud ni Talle nga ang managsuon gipaubos sa Oplan Tukhang sa niaging buwan apan wala kini motahan.

Natulog gipusil

Grabeng naangol ang usa ka gikatahapang pusher og shabu sa Dancar, Poblacion, Dakbayan sa Danao alas 2 pasado sa niaging kadlawon.

Si Police Officer 3 Joel Illustrisimo sa Danao City Police Station niila sa napusilan nga si Tomas Bueno, 45- anyos,  walay  trabaho nga nagpuyo sa maong dapit.

Matud ni Illustrisimo nga natulog sa sulod sa ilang panimalay ang biktima dihang gisaka sa wala hiilhing lalaki.

Ang biktima nalakip sa listahan sa mga drug personalities sa kapolisan apan wala nitahan ubos sa Oplan Tukhang.

Nasuta sa mga sakop sa Scene of the Crime Operatives nga ang biktima nakabaton og samad pinusilan sa tiyan, abaga, mga bukton ug ulo. (BANAT NEWS)