‘Iron Lady of Asia’ nipanaw na

CEBU, Philippines - Nitaliwan na ang usa sa mga tinahod nga nangalagad sa nasud, ang gitawag nga The Iron Lady of Asia nga si Senadora Miriam Defensor-Santiago sa edad nga 71 samtang kini natulog.

Sa taho sa The Philippine Star, ang bana ni Santiago nga si manlalaban Narciso "Jun" Santiago maoy nikumpirmar sa kamatayon sa beteranang senadora.

Ang staff sa kanhi senadora niingon nga namatay kini alas 8:52 sa buntag kagahapon.

Ang kanhi kauban ni Santiago nga si Sen. Grace Poe, maoy nipahibawo sa subo nga balita ngadto sa iyang mga kaubanan atol sa hearing sa Senado kabahin sa freedom of information bill nga gisuportaran ni Santiago niadtong naglingkod pa siya sa senado. Si Poe nangayo og makadiyot nga kahilom ug pag-ampo alang sa nitaliwan nilang kauban.

Samtang si Presidente Rodrigo Duterte nipadayag sa iyang pahasubo pinaagi sa usa ka statement samtang atoa  pa kini sa Vietnam alang sa duha ka adlaw nga state visit.

"Senator Santiago has left a sterling career in public office. She is best remembered as a graft buster  'eating death threats for breakfast,' earning her the (tag) Iron Lady of Asia,” tipik sa statement ni Duterte.

Iyang gitataw nga ang senadora mahinumduman gyud tungod sa iyang adbokasiya sa rule of law ug nanghinaot kini nga unta magpadayon ang iyang kabilin.

“Rest in peace, Madam Senator.  May your legacy continue to guide this nation for many years to come," dugang sa presidente.

Si Miriam na-diagnosed og late-stage lung cancer niadtong tuig 2014 apan iyang gideklarar nga iya kining gilupig sulod sa usa ka tuig maong nidagan siya pagka-presidente  apan napildi siya ni Duterte niadtong piniliay sa Mayo.

Wala pa matapos ang iyang termino, ni-file si Miriam og indefinite leave gumikan sa iyang sakit.

Si Santiago nga lumad nga taga Iloilo maoy usa sa mga gikahimut-an nga politiko sa nasud, ingon man sa pop-culture ug sa mga tunghaan.

Nidagan ug nahimo siyang senador niadtong tuig 1995 diin ubay-ubay siyang nahimong mga balaud sama sa International Humanitarian Law, Magna Carta for Women ug Anti-Bullying Law.

Siya usab ang labing unang Pilipino nga napili sa International Criminal Court niadtong tuig 2011 apan wala siya modayon gumikan sa chronic fatigue syndrome.

Alang sa uban, siya unta ang usa sa labing maayo nga presidente sa Pilipinas nga wala matuman human mapildi tulo ka higayon. Gikan sa report sa The Philippine Star (BANAT NEWS)