Di motuong drug protectors ang duha ka police officials

CEBU, Philippines - Dili makatuo si Cebu City Mayor Tomas Osmeña nga tigdawatan og payola gikan kang Franz Sabalones kinsa gitumbok nga bigtime drug lord sa Probinsiya sa Sugbo sila si Superintendent George Ylanan ug Superintendent Rex Derilo. Ang duha kanhi nadestino sa Police Regional Office(PRO) -7 apan karon gibalhin og laing lugar.

Sigon ni Osmeña dihang napatay sa maong mga pulis si Jeffrey Diaz alyas Jaguar nga maoy number one drug lord sa Central Visayas sila si Ylanan ug Derilo mipahibawo kaniya nga mohimo sab sila og operasyon aron pagsikop kang Sabalones.

Gani sa mga operasyon nga gipahigayon nila ni Ylanan ug Derilo bisan og pakyas sila sa pagdakop kang Sabalones apan ang mga tawo niini nasikop man.

Gipasabot sa mayor kon protektor pa sila si Ylanan ug Derilo ni Sabalones nganong ilaha mang gigukod ug gisikop ang iyahang mga tawo.

“I really don’t like to believe that because they’ve done a great job here in Cebu City,”matud ni Osmeña.

Dugang ni Osmeña dihang girelibuhan si Supt. Ylanan isip Deputy City Director for Operation sa Cebu City Police Office (CCPO) ang mihulip kaniya mao si Superintendent Romeo Santander nga gihulagway ni Osmeña nga daghang derogatory records.

Gitataw niini, wala ra usab maabot og pila ka adlaw ang paglingkod ni Santander human kini ginganlan ni Presidente Rodrigo Duterte nga drug protector. Gihimug-atan usab ni Osmeña nga sa habagatang bahin sa Sugbo ang operasyon ni Sabalones ug dili kini aktibo sa siyudad sa Sugbo. (BANAT NEWS)