Clerk sa korte nangawat og CPU

CEBU, Philippines - Empleyado sa korte nangawat og CPU sulod sa Capitol compound kagahapon sa kaadlawon.  Nabantayan sa guwardiya sa Kapitolyo nga si Dennis Golden kinsa padulong nga mopanso nga adunay kasikas sa luyo sa Water and Clinical Laboratory sa Capitol compound mga alas 4:40 sa kaadlawon. Dihang iyang gisusi, niikyas ang usa sa duha ka lalaki apan ang usa wa na makaipsot.

Giila sa head guard sa Tactical Security nga si Rosario Tigle ang maong lalaki nga si Algarme Carlo Labra, empleyado sa Cebu City Prosecutor’s Office.

Giingong nahimong rason ni Labra nganong naabot siya sa maong dapit mao nga nangahoy kuno siya ug nanguha og kaka apan wala motuo ang mga guwardiya ug gikapkapan kini. Walay nakuha nga hinagiban gikan niini apan nakit-an nila ang usa ka CPU nga giputos og t-shirt.

Ang gilungkab nga CPU ni Labra gikan sa laboratory sa Kapitolyo basi na usab sa pamahayag sa pangulo sa maong buhatan. Gipriso si Labra, sa Fuente Police Station human kini gitugyan sa mga guwardiya. (BANAT NEWS)