Provincial Board nipasidaan bahin sa mga bagyo

CEBU, Philippines - Gipasidan-an sa Provincial Board ang mga lokal nga kagamhanan sa probinsiya nga mangandam sa mga bagyong moabot sa nasud.

Kini human ang Philippine Atmospheric Geophysical and Astronomical Services Administration (PAGASA) nipahibawo nga walo ka bagyo ang gipaabot nga moigo sa Visayas karong Oktubre hangtud Disyembre.

Matud ni Bokal Thadeo Jovito Ouano ang atmospheric condition posibleng dunay kausaban sa forecast apan sa ulahing teknolohiya ang weather bureau makahibawo na sa dagan sa Pacific Ocean duha ka semana sa dili pa mamugna ang bagyo.

Sumala pa ni Ouano nga importante nga mapasidan-an ang publiko aron sila mangandam sa dili pa moabot ang katalagman.

Lakip sa bantayan ang gidaghanon sa uwan ug dili lang ang gikusgon sa hangin tungod kay ang pagkaanod ug pagkalumos sa baha maoy hinungdan nga daghang mangamatay atol sa bagyo. Gisanglitanan ni Ouano ang bagyong Yolanda nga daghan ang nangamatay. (BANAT NEWS)