100 pamilya sa Budlaan nameligro

CEBU, Philippines - Nameligro ang sitwasyon sa dili mominus usa ka gatus ka pamilya daplin sa sapa sa Sitio Lower Tac-an, Barangay Budlaan, Dakbayan sa Sugbo.

Kini ang reklamo nga nadawat ni acting Mayor Edgar Labella gikan ni Barangay Kapitan Nerissa Antulihao.  Ang lugar mao ang relocation site sa mga residente kaniadto sa Upper ug Lower Carreta pinaagi sa National Housing Authority.

Nakita mismo ni Labella nga delikado gyud nga mahugno kun magpadayon ang paghulpa sa yuta kung magsige og uwan tungod kay kusog ang bul-og sa tubig sa sapa.

Matud ni Joel Espinosa, 52-anyos, nga gipaabot na nila sa NHA ang reklamo apan walay aksiyon.

Giawhag ni Labella ang mga konsehal sa siyudad nga mopalabang og resolusyon alang sa pag-andam og Program of Works and Estimates ug i-refer usab niya kini sa City Budget Office aron mabutangan dayon og riprap ang lugar sa daling panahon.

Ang pangulo sa Cebu City Disaster Risk Reduction and Management Office, Nagiel Bañacia, niingon nga nipahigayon na sila og inspeksiyon sa dapit ug gani duna na man silay rekomendasyon sa City Engineering’s Office ug gihimoan na kini og POWE.

Matud ni Bañacia nga delikado gyud ang sitwasyon apan dili mahimong pahawaon ang namuyo hinungdan nga ilang giawhag nga magmatngon samtang wala pa ang riprap aron malikay sa disgrasya. (BANAT NEWS)