Asset gibuko-buko patay

CEBU, Philippines - Wala kabunot sa iyang dala nga pistola ang 48-anyos nga gidudahang asset sa Regional Intelligence Division-7 human kini gipusil samtang paingon maghugas sa iyang motorsiklo sa Sabellano Street, Kamanse, Upper Kinasang-an, Pardo, Dakbayan sa Sugbo pasado alas 6 kagahapon sa buntag.

Ang biktima giila nga si Charito Mepico, 48, minyo, negosyante og kahoy nga nagpuyo sa maong dapit.

Sayo sa buntag samtang nangabli sa iyang tindahan nga Janice Lumber ang biktima ug paingon maglimpyo sa iyang motorsiklo, kalit lang niabot ang duha ka lalaki nga nagsakay og motorsiklo.

Ang backrider maoy namusil sa biktima sa likod sa makadaghan nga higayon ug paspas kaayong nakasibat pahilayo.

Lima ka basiyo sa .9mm pistol ang nakuha sa mga polis sa crime scene.

Sumala pa ni Police Officer 3 Edario Manatad, imbestigador sa homicide section sa Cebu City Police Office, nga sa pagkakaron tulo ka anggulo ang ilang gitan-aw nga posibleng motibo sa pagpamusil.

Kini mao ang gitug-an sa asawa nga tiggamitan og drugas ang iyang bana, pagka-asset sa kapolisan ug ang impormasyon sa igsuon sa biktima nga matud pa dunay laing karelasyon ang asawa niini.

Sa pagresponde sa mga polis, ilang narekober gikan sa hawakan sa biktima ang .45 caliber pistol, upat ka magazine nga may 26 ka bala. Lakip sa nakuha sa mga polis ang confidential identification card gikan sa RID-7 nga gipirmahan ni Supt. Rex Derilo.

Si Manatad niingon nga iya pa subayon kung tinuod ba ang ID sa biktima ug kung tinuod ba kini nga asset sa kapolisan.

Ang biktima giingong nakakita sab og lalis sa Barangay Duljo Fatima human kini nakit-an nga nagdala og armas nga gidudahang asset sa polis duha ka semana na ang nakalabay.

Sa niaging adlaw, giingong may nangita  sab sa biktima ug posibleng hinungdan nga nagtakin na kini og armas. (BANAT NEWS)