1 patay, 3 angol sa dinunggabay sa Munti

CEBU, Philippines - Napatay ang usa ka high-profile nga binilanggo ug naangol ang laing tulo niya ka kauban sa pagpanunggab nga nahitabo sulod sa New Bilibid Prison didto sa Muntinlupa City kagahapon sa buntag.

Ang namatay mao si Tony Co, samtang ang nangaangol mao ang drug lord nga si Peter Co, Vicente Sy ug si Jaybee Sebastian nga giingong suod ni Senador Leila De Lima.

 Ang mga samaron gidali pagdala sa ospital. Si Justice Secretary Vitaliano Aguirre niingon nga nahitabo ang kagubot alas 7:40 sa buntag diha nga si Peter, Tony ug si Vicente nasakpan nga nigamit og shabu.

Gipangkasab-an sila ni Clarence Dungail, laing binilanggo nga kanhi opisyal sa kapolisan ug lider sa selda. Matud pa nga ang tulo ka piniriso nga gipangkasab-an ni Dungail misumbong kang Sebastian ug maoy nakasugod sa kagubot.

Si Dungail nasamdan usab apan nagdumili nga magpadala sa tambalanan. Gibadlong ni Dungail ang tulo ka binilanggo nga nigamit og shabu kay nabalaka nga silang tanang piniriso ang maproblema kun mahibaw-an nga nagpadayon ang binuang sulod sa prisohan.

Si Justice Secretary Aguirre nabalaka kay si Sebastian nga nadunggaban sa dughan ipresentar pa nila sa House Committee on Justice kalabot sa nagpadayong imbestigasyon sa pagkuyanap sa drugas sa Bilibid.

Si Peter Co maoy drug lord sa Bilibid nga gihinganlan ni Presidente Duterte nga nagpadagan sa shabu laboratory sulod sa Bilibid ug supplier sa drugas ni Kerwin Espinosa, ang anak sa mayor sa Albuera, Leyte.

Si Senador De Lima nagtuo nga ang giingong rayot sulod sa Bilibid gimik lang sa administrasyon ni Duterte aron madasig ang mga konbiktado nga binilanggo pag-testify batok kaniya. (BANAT NEWS)