2 ka bata napaig

CEBU, Philippines - Tulo ka sunog ang niulbo sa dakbayan sa Sugbo kagahapon nga nisangpot gyud sa pagkamatay sa duha ka bata nga nalakip pagkasunog sa ilang panimalay.

Ang sunog nga napatyan og duha ka bata niulbo didto sa Hillside, Talamban, ang ikaduhang sunog nahitabo sa Sabellano Street, Punta Princesa ug ang ikatulo sa Barangay Ermita.

Si Cebu City Fire Marshall Rogelio Bongabong nitug-an nga ang sunog sa Talamban nagsugod sa panimalay ni Matea Llorag dihang hapit na mo alas 12 sa udto ug nakontrolar ang kayo paglabay sa 20 minutos.

Ang duha ka bata nga sila si Terrence John Garcia, tres-anyos, ug ang manghod nga si Bryle Cedric, tulo pa lang ka buwan, didto matulog sa taas sa panimalay ug wala na makuha sa iyang uyoan ug apohan dihang miulbo ang kayo ug patay na nga naugkat.

Ang inahan sa mga bata nga si Kimberly nitug-an nga didto pa siya sa iyang trabahoan ug gipahibalo na lang nga nasunog ang ilang balay ug nalakip ang iyang duha ka anak kay wala maatiman sa uyoan niini nga si Ryan Llorag.

Miabot og 15 ka panimalay ang naapektohan sa sunog sa Talamban ug ang kadaot gibanabanang mikantidad sa P300 mil. Ang mga ginikanan sa bata ipatawag sa kabomberohan aron pagsuta sa hinungdan sa sunog.

Ermita

Ang ikaduhang sunog niulbo sa balay nga gipanag-iya ni Geraldine Flores sa Barangay Ermita kagahapon sa kaadlawon.

Wala hinoon makatapon ang kayo ngadto sa laing kabalayan ug napawong dayon kini sa mga silingan.

Nagtuo si Flores nga ang ilang lamparilya nabag-iran sa ilaga ug natumba nga maoy nakaingon sa pagsilaob sa kayo.

Si Flores niingon nga pag-ulbo sa kayo sa iyang panimalay didto siya sa balay sa iyang silingan nagtan-aw og salida pinaagi sa internet.

Punta Princesa

Samtang usa ka bodega nga nahimutang sa dalan Sabellano, Barangay Punta Princesa ang nasunog usab mga alas 8:25 sa buntag.

Ang bodega gipanag-iya ni Doolani Generosa nga dugay-dugay gyud nga gikumbati sa kabomberohan.

Mga kabtangan nga gibana-banang nikantidad og P1.2 milyones gilamoy sa kayo nga wala dayon mahibaw-i ang hinungdan. (BANAT NEWS)