Labella nabalaka sa pagdaghan na sab sa street dwellers
CEBU, Philippines - Naalarma si Cebu City Acting Mayor Edgardo Labella sa pagdaghan na usab sa mga street dwellers sa pipila ka lugar sa dakbayan diin ang kadalanan maoy gihimo na nilang panimay.
Asoy ni Acting Mayor Labella nga taod-taod na niyang nabantayan nga nigara na sab ang mga tawo nga matulog sa aseras.
Sigon niini nga matag alas 5 sa kadlawon atol sa iyang pag-jogging, molibot siya sa Fuente Osmeña, Mango Ave. ug Osmeña Blvd. ug didto iyang nakita nga nidaghan gyud ang mga tawo nga gihimong balay ang kilid sa karsada ug mga skywalk.
Gani iyang nakita nga adunay gitukod nga barong-barong sa usa sa mga skywalk sa Fuente ug gikabalak-an niya nga basin og ila kini’ng padak-an ug himoon na gyud nilang balay.
Gumikan niini, giawhag ni Labella ang executive department nga tapukon ang Anti-mendicancy Board nga maoy mosusi sa sitwasyon aron dili managhan ang mga tawo nga matulog sa aseras.
Sigon ni Labella, ang maong board walay operasyon mao nga kinahanglan kining ibalik kay sagad sa mga anaa sa aseras, mga bata ug batan-ong mga babaye.
Kun magpadayon ang ingon niini nga senaryo sa kadalanan, maghatag kini og bating imahe sa siyudad ug posible nga mao kini ang sinugdanan aron ang mga kabatan-onan, mohimo og ilegal nga binuhatan ug manglimos.
Gihulagway ni Labella nga kaniadto, ang Anti-Mendicancy Board aktibo kaayo sa paghipos sa mga night dwellers diin ila kining pukawon og ihatod sa ilang mga pinuy-anan. (BANAT NEWS)
- Latest