Buy-bust sa motel, 1 patay

CEBU, Philippines - Nakabsan sa kinabuhi samtang gidala sa tambalanan ang usa ka lalaki nga gidudahang tigpahuyot sa ilegal nga drugas human kini napusilan sa mga mosikop unta kaniyang mga sakop sa Regional Special Operations Group-7.

Ang insidente nahitabo atol sa buy-bust diha sa usa ka motel sa Brgy. Mabolo ning Dakbayan sa Sugbo pasado alas-8 sa nakalabay nga gabii.

Ang namatay mao si Jay Sanchez, taga Brgy. Matab-ang sa Dakbayan sa Toledo. Ang maong operasyon gipangulohan ni Sr. Insp. Ricardo Tero sa RSOG-7 nga giabagan sa mga sakop sa City Intelligence Branch (CIB) sa Cebu City Police Office.

Nahitabo ang pinusilay human nakabantay si Sanchez nga polis ang iyang ka-transaksyon sa ilegal nga drugas. Matud pa mibunot si Sanchez sa iyang dala nga revolver.

Nakaangkon og samad pinusilan sa lawas ang suspetsado ug sulay pa unta nga gidala sa Mandaue City Hospital, apan nakabsan gayud kini sa gininhawa.

Gihimo ang operasyon human sila nakadawat og impormasyon bahin sa ilegal nga kalihokan sa suspetsado hangtud nga nakahigayon sila pakig-transaksyon kaniya.

Narekober sa mga polis gikan sa suspetsado ang usa ka .22 revolver, napulo ka mga bala, tulo ka medium size sa gituohang shabu ug cash nga P3,000. (BANAT NEWS)