CPDRC inmates gi-Tukhang
CEBU, Philippines - Mipahigayon og Oplan Tukhang ang sakop sa kapolisan ngadto sa mga piniriso sulod sa Cebu Provincial Detention and Rehabilitation Center (CPDRC) kagahapon.
Pinaagi sa Provincial Public Safety Company nga maoy mitabang sa seguridad sa provincial jail, giawhag nila ang mga piniriso nga moundang na sa bisyo sa ilegal nga drugas.
Matud ni Sr. Inspector Zosimo Jabas ang team leader sa PPSC nga dili malikayan nga bisan kun anaa na sulod sa prisohan aduna gihapon mga piniriso nga mogamit og ilegal nga drugas.
Ang mga inmates gipapirma og affidavit nga nanaad nga dili sila mogamit og ilegal nga drugas, ug pagkahuman naghimo og profiling ug gikuhaan sila og mga hulagway.
Gitataw hinoon ni Jabas nga ang pagpirma boluntaryo ug wala sila pugsa. Silang tanan ipaubos kini sa monitoring ug kun adunay masakpan nga naggamit og ilegal nga drugas, posible masuspenso ang prebilihiyo lakip na ang dalaw ug madugangan ang kaso nga ipasaka.
Matud ni Jabas nga 60% sa mga inmates sa CPDRC pulos nag-atubang og kaso sa kalambigitan sa ilegal nga drugas.
Ang CPDRC, aduna kini 2, 933 ka mga priso karon ug ang 1, 705 niini adunay kaso sa ilegal nga drugas. (BANAT NEWS)
- Latest
