Bojo River gipasidunggan; canyoneering gi-awayan

CEBU, Philippines - Napili nga usa sa mga Top 100 Sustainable Destinations sa tuig 2016 ang Bojo River sa lungsod sa Aloguinsan.

Gibutyag ni Boboi Costas, hepe sa provincial tourism office nga tulo ka tourist destination sa Pilipinas nga gilangkuban sa Lake Holon ug Lake Sebu sa South Cotabato ug Bojo River sa Aloguinsan ang naapil sa finalist.

Ang award winning body nga Green Destination, usa ka non-government organization (NGO) ug giklaro ni Costas nga walay premyo nga cash ang maong pasidungog diin ang awarding gipahigayon ngadto sa Slovenia kagahapon sa gabii.

Apan makagamit sila sa logo sa Green Destinations ug sa maong pasidungog daku kaayo kining tabang nga mouswag pa ang turismo sa Aloguinsan nga nakadawat usab sa Tourism inSpire Awards sa United Nations sa milabay’ng tuig.

Samtang gikatakdang magtagbo na usab karong Biyernes sa Kapitolyo ang mga opisyal sa lungsod sa Alegria ug Badian aron mopresentar sa ilang mga sugyot sa pagdumala sa canyoneering sa ilang lugar kini human nagkabangi sila kabahin sa ilang mga utlanan.

Matud ni Costas nga ang duha ka habig gipasumitir og proposal alang sa ilang co-management sa canyoneering ug buot sa Kapitolyo nga makab-ot ang win-win solution sa problema.

Nipadala og team si Costas sa duha ka lungsod aron mogama og baseline ecological assessment sa sapa diin gipahigayon ang canyoneering.    

Gipasabot niini nga dili mahimo ang co-management sa canyoneering kun wala sila’y baseline data.

Tumong usab sa assessment mao ang pagprotekta sa mga species sa lugar ug mismo sa maong tourist area.

Ang canyoneering sa lugar gipahigayon na sa milabay’ng 10 ka tuig ug giangkon ni Costas nga bisan og ulahi na ang paghimo og assessment kinahanglan gyud nila kining buhaton aron mapreserba ang lugar ug ang mga species niini. (BANAT NEWS)