2 ka Romanian nag-withdraw gamit ang rewards card
CEBU, Philippines - Duha ka Romanian nationals nga gidudahang nalambigit sa sindikato pinaagi sa pag-withdraw og kwarta gikan sa mga accounts sa mga nagpuyo sa gawas sa nasud, ang nasikop sa police operation niadtong nakalabay nga adlaw.
Ang maong operasyon gihimo sa Criminal Investigation and Detection Group (CIDG) 7 ug Regional Public Safety Battalion batok nilang Ilie Stancu, 28 anyos ug Mihai Voicu nga mga taga nasud sa Romania. Gikatahong nasakpan ang duha nga ni-withdraw og kwarta sa ATM sa Brgy. Banilad sa dakbayan sa Mandaue gamit ang mga peke nga cards.
Matud ni PCIns. Rene Kyamko, hepe sa CIDG-7 Special Operation Team nga si Stancu ug Voicu na-report sa ilang buhatan human nasigpatan nga nagkuha og kwarta gamit ang kadudahang mga cards. Gawas sa mga nasakmit nga peke nga cards, narekober sab gikan kanila ang salapi nga nagkantidad og P100 mil.
Sumala pa ni Kyamko nga ang duha nigamit og rewards card sa usa ka convenience store nga maoy ilang gigamit isip ATM card ug ang biktima nila pulos ra sab mga taga Romania. Ang pagkasikop sa duha dili maoy labing unang hitabo dinhi sa Sugbo kay niadtong nakalabay nga tuig tulo sab ka Romanian ang nadakpan sa kapolisan sa susamang kaso. (BANAT NEWS)
- Latest