Bayrunon sa tubig, kuryente sa duha ka presinto makapaduda

CEBU, Philippines - Nihimo og pakisusi si Cebu City Councilor Dave Tumulak labot sa electric ug water bills sa mga nagkadaiyang police stations sa siyudad diin iyang nasuta nga adunay mga presinto nga dagko kaayo og bayranan. Kagahapon sa buntag, personal nga giadto ni Konsehal Tumulak ang Pardo Police Station aron susihon kun nganong daku sila og bayranan sa kuryente matag buwan nga muabot og P32 mil ngadto sa P34 mil nga unta ang gamit lang nila mao ang 3 ka aircon ug 6 ka computer units.

Ang kagamhanan sa siyudad sa Sugbo maoy tigbayad sa bill sa kuryente ug tubig sa mga police stations diin kapin sa P10 milyones ang gigahin sa annual budget.Tungod niini ipasusi ni Tumulak sa Visayan Electric Company ang maong kaso aron ma-verify ang mga linya sa kuryente kay nagduda siyang adunay pagpangawat sa kuryente ug dili makiangayon nga ang maong presinto maoy magbaguod sa bayranan.

Dugang ni Tumulak nga sa tanang presinto sa siyudad, ang sa Pardo maoy adunay labing daku nga bayranan sa elektrisidad ug dili usab siya makasulti nga lakip sa gibayran niini mao ang kuryente sa merkado nga duol sa istasyunan sanglit ang nakabutang sa resibo, Pardo Police Station lang.

 Gipasabot sa konsehal nga ang iyang gihimo kabahin sa ilang tinguha kun unsaon nga makadaginot ang siyudad sa binuwan nga bayranan kay mao kini ang gihatag nga direktiba ni Mayor Tomas Osmeña.

Lakip nga susihon sa konsehal ang Guadalupe Police Station kay base sa ilang listahan ang bayrunon sa tubig matag buwan sa maong presinto muabot og P16 mil ngadto sa P20 mil. Hinungdan nga ipasusi kini ni Tumulak sa Metropolitan Cebu Water District aron mahibaw-an kun aduna bay leaking sa tubo nga maoy hinungdan nganong dako kaayo ang bayranan. (BANAT NEWS)