Gipusil sa disco, babaye napagan

CEBU, Philippines - Grabeng naangol ang usa ka tawo nga biktima sa pagpamusil sulod sa disco ug may napagan nga babaye sa Sitio Barocon, Lugo, Borbon alas 11 pasado sa niaging gabii.

Si Senior Police Officer 3 Owen Codilla Baticuang sa Borbon Police Station niila sa mga biktima nga sila si Rey Laurel Pinote, 49-anyos, nagpuyo sa maong dapit ug Editha Monto, 35, taga Dakbayan sa Mandaue.

Ang suspek nga dali nga nakasibat giila nga si Eric Apor, 24, minyo nga nagpuyo sa maong dapit.

Matud ni Baticuang nga nagpahigayon og disco sa niaging Sabado sa gabii isip kabahin sa kalingawan sa tinuig nga pangilin sa ilang kapilya ug si Pinote nga nagpakita sa iyang kahanas sa pagsayaw nga daw gikasinahan sa suspek.

Si Monto nga duol ni Pinote ang natapsingan ang dunggan niini.

Ang mga biktima dali nga gidala sa Juan Dosado Memorial Hospital sa Barangay Damulog sa Lungsod sa Sogod apan si Pinote nga nagrabehan ang gibalhin sa Vicente Sotto Memorial Medical Center sa Dakbayan sa Sugbo. (BANAT NEWS)