Mohapak unta og pala nabawsan og kutsilyo
CEBU, Philippines - Nalandig sa tambalanan ang usa ka truck helper human gidunggab sa iyang kauban sa ilang gikatulgan sa Uldog St., Poblacion, Dakbayan sa Talisay kagahapon sa kadlawon.
Samdan sa iyang tiyan si Jemson Mulato, 22, ulitawo nga lumad nga taga Bahi, Loon, Probinsya sa Bohol.
Ang suspek nga gipangita sa kapolisan mao si Rodel Oro, 18, ulitawo nga lumad sab nga taga Negros Oriental.
Nasayran nga nag-inom ang biktima ug ang suspek kuyog sa ilang mga kauban.
Apan sa dihang nangahubog na sila nitumaw ang panaglalis hangtud nga nikuha og pala si Mulato ug nisuway kini og hapak ngadto kang Oro.
Maayo nalang kay wala naigo apan sa dihang natulog na si Mulato, gikamang kini ni Oro bitbit ang kutsilyo ug gidunggab ang biktima sa tiyan.
Gidala sa Talisay City Hospital ang biktima samtang ang suspek nisibat na sa lugar nga iyang gitrabahoan. (BANAT NEWS)
- Latest