Traffic light hinungdan sa trapik
CEBU, Philippines - Gipasanginlan ni Talisay City Mayor Eduardo Gullas ang traffic light nga nakaingon sa nagdasok nga mga sakyanan sa South Road Properties (SRP).
Gihulagway ni Gullas nga daw dili sakto ang paghatag og pagtuon sa numero sa mga traffic lights kun kanus-a kini mo Go o Stop.
Iyang gikuhaan og base ang eskina Laray diin adunay 172 nga numero kun diin maabtan na lang nga wala nay moagi padulong sa Inayawan samtang naglumbay na ang sakyanan nga mopadulong sa Siyudad sa Sugbo ug sa habagatan.
Asoy pa niya nga dili lang ang traffic light nga iyang nabantayan nga ingon niana apan hasta ang uban nga eskina.
Siya nimando sa City of Talisay-Traffic Operation Development Authority (CT-TODA) nga tun-an una nila pagbalik og unsa gyuy saktong numero nga ilang ibutang sa traffic light ug ipatuman lang una ang mano-mano.
Sa nasayran ang modernong traffic light ang gitaud panahon ni kanhi mayor Johnny de los Reyes nga nigasto og P14 milyones apan gikuwestiyon sa Commission on Audit (COA) tungod kay ang kontraktor dili kwalipikado moapil sa bidding.
Gawas pa niana, wala pa gyud nahuman sa pagtaud ang kinatibuk-ang proyekto sa kontraktor ug ang siyudad aduna pay utang niini.
Gipa-review na ni Gullas ang maong kontrata sa City Legal Officer. (BANAT NEWS)
- Latest
