Bus nibangga sa dump truck 1 patay
CEBU, Philippines - Usa ang patay, lima ang naangol human nibangga ang bus nga ilang gisakyan sa mini dump truck nga naghabwa og balas sa may Brgy. Juan Climaco Sr. (Magdugo) sa dakbayan sa Toledo niadtong Sabado sa hapon.
Giila sa mga otoridad ang nakalas nga si Eduardo Liogan, 48 anyos taga Lungsod sa Pinamungajan kinsa usa sa mga pasahero sa Mark Gabe 4 Calvo Bus Liner nga gimaneho ni Apolinario Bacaro, taga Brgy. Lut-od, Pinamungajan.
Samtang ang naangol naila nga sila si Jovanie Laranjo, Jundel Oyao, Cirpriano Sarsa, Michael Sardual ug Rigie Cabante.
Matud ni PO3 Carlos Barluado, desk officer sa Toledo City Police Station nga base sa initial investigation nga gipahigayon sa iyang kauban nga si PO3 Julius Sanchez, gihabwaan og balas ang mini dump truck nga gimaneho ni Raul Abella dihang niigo ang bus nga gikan sa dakbayan sa Sugbo.
Sumala pa ni Barluado, sa dihang naigo ang bus sa dump truck, natagak usab kini sa culvert dayon balitok nga maoy naingnan sa pagkamatay Liogan ug pagkaangol sa lima ka biktima nga gidala sa Toledo City Hospital.
Dugang ni Barluado, dad-on unta sa Vicente Sotto Memorial Medical Center ang ubang biktima nga naglakip kang Liogan apan nakabsan gyud kini sa iyang kinabuhi gumikan sa grabeng kadaut nga nahiaguman sa iyang kalawasan.
Nitahan usab dayon ang drayber sa bus sa buhatan sa kapolisan sa Toledo ug nagpaabot og pormal nga reklamo gikan sa pamilya sa mga biktima. (BANAT NEWS)
- Latest
