Daklit nga pag-uwan sa Metro Cebu

CEBU, Philippines - Nagpabilin ang gikusgon sa Bagyong "Helen" samtang kini nag-irog pangadto sa kasadpan amihanang-kasadpan sa direksyon sa nasud sa Taiwan.

Ang bagyong Helen nagdala og kasarangan ngadto sa makusog nga pagbunok sa uwan adunay gilapdon nga 800 km diameter hinungdan nga mipasidaan ang PAGASA nga peligro ang pagbiyahe sa kadagatan sa amihanan ug silangang bahin sa Northern Luzon.

Ang mata sa bagyo base sa kataposang lokasyon niini alas-4 sa hapon kagahapon nasigpatan 880 km silangang bahin sa Calayan, Cagayan ug nagdala kini og hangin nga 140 kph duol sa tungatunga niini ug haguros nga 175 kph ug nag-irog sa gipaspason nga 22 kph.  Ang Batanes ug Calayan gibutang sa Signal No. 1.

Gibanabana nga karong hapon adlaw nga Lunes anaa kini mahimutang  395 km East Northeast sa Basco, Batanes ug 295 km North Northwest mao gihapong lugar ugmang adlawa ug karong adlaw nga Miyerkules gibanabana kining nahimutang 615 km Northwest sa Basco, Batanes gawas na sa Philippine Area of Responsibility.

Dinhi sa Kabisay-an masinati ang panagsang madag-umon ngadto sa madag-umon nga kalangitan inubanan sa pag-ulan ug pagpanugdog. Samtang hinay ngadto sa kasarangan nga hangin nga magagikan sa habagat ngadto sa habagatang-kasadpan inubanan sa malinawon ngadto sa kasarangan nga kadagatan.

Kagahapong adlawa, atol sa pagbunok sa kusog nga uwan, nakasinati og mga pagbaha sa kadalanan sa pipila ka mga barangay sa Dakbayan sa Sugbo.

Sumala ni Isko Ouano, ang operation chief sa Cebu City Traffic Office ang City Command Center (C3) nakadawat og mga report bahin sa pagbaha diha sa Brgy. Guadalupe, Sapangdaku, Tintay ug Talamban.

Samtang aduna say nahitabong pagdahili sa yuta alas 2:50 kagahapon sa hapon diha sa Golden Valley Homes, Brgy. Lahug, Siyudad sa Sugbo. Gidudahan nga ang paghumok sa yuta tungod sa pagsige og uwan maoy hinungdan niini.

Suma pa sa usa ka residente nga si Mark Daryl Gorne nga nakasaksi sa maong panghitabo nga sa mga miaging buwan nila nasuta nga huyang na ang maong yuta kilid sa sapa.

Ilaha na kining gisabutan sa ilang asosasyon aron unta dalion ug mapugngan ang maong insidente apan gumikan sa kakulang sa ilang pundo wala nila kini mabuhat hangtud nga nahitabo gyud ang ilang gikabalak-an kagahapon.

Dugang pa niya, bisan nag makasinati lamang sila og hinay nga uwan, dali ra gayud bahaon ang ilang lugar ug una kining panghitabo nga nag-landslide sa ilang lugar.

Usa ka sakyanan ang naapil og katagak sa paghunlak sa yuta padung sa ubos. Wa hinuoy natala nga nakalas o nasakitan sa maong insidente.

Samtang gipahibalo ni Engr. Alfredo Quiblat, officer-in-charge sa PAGASA-Mactan station nga makasinati og kalit-kalit nga pag-ulan ang Metro Cebu tungod kay kabahin  kini sa lapad nga nasakop sa bagyong Helen nga nakasulod na sa PAR. ?Report gikan sa wires (BANAT NEWS)