Minors di baligyaan og sigarilyo

CEBU, Philippines - Dili na unya makabaligya og sigarilyo ngadto sa mga minor de edad sa Dakbayan sa Mandaue.

Kini sa higayon nga mahingpit na ang pagpasar sa ordinansahon alang niini ingon man ang pagdili sa pagpanigarilyo sa mga pangpublikong lugar sama sa mga buhatan sa gobiyerno.

Sa gipatawag nga public hearing sa konseho nga gitambungan sa mga molupyo sa kabarangayan ug nagkadaiyang sektor maoy ilang giuyunan ang pagpasar sa duha ka ordinansahon sanglit nakita ang maayong katuyoan niini.

Naglakip sa nitambong sa public hearing ang mga barangay kapitan, mga doktor sa Mandaue City Hospital, mga magpapatigayon ug uban pa.

Ang ordinansahon mag-amendar sa duha ka ordinansa nga naumol niadto pang tuig 2002 ug 2011 apan wala napatuman sa kagamhanan.

Matud ni Konsehal Kevin Cabahug, chairman sa committee on health, nga makahatag og kaayuhan ang maong ordinansahon.

Iyang gitumbok ang nalatid sa Local Government Code nga nagmando sa paghatag og kasegurohan sa panglawas sa katawhan.

Ang pagpanabako sa kabataan ang posibleng magtukmod sa kahigayonan nga mogamit usab og shabu o marijuana panahon sa panagtapoktapok.

“So, we should implement this to avoid our youth from smoking,” matud ni Konsehal Nilo Seno. (BANAT NEWS)