Alsa Droga gilusad sa Mandaue

CEBU, Philippines - Hugot nga gipaluyuhan sa mga opisyal sa barangay sa Dakbayan sa Mandaue ang kampanya sa pagsumpo sa ilegal nga drugas pinaagi sa ilang pag-apil sa dungan nga paglusad sa Alsa Droga sa Mandaue City Police Office.

Ang Alsa Droga usa ka programa sa kapolisan sa Central Visayas aron palig-onon ang kampanya batok sa ilegal nga drugas labi na sa nasugdan nga Oplan Tuktok Hangyo (Tukhang) diin kapin na sa dos mil ang nisurender nga mga drug personalities.

Niining higayuna nangayo og tabang ang kapolisan sa suporta sa katawhan sa barangay pinaagi sa mga kapitan.

Si Kapitan Ernie Manatad, ang pangulo sa Liga ng mga Barangay sa dakbayan, maoy nipapanumpa sa mga partisipante nga sila andam moabag sa kampanya sa kapolisan.

Si Bise Mayor Carlo Fortuna kinsa usa sa mga gidapit sa kapolisan nipadayag nga hugot kaayo ang suporta sa kagamhanan sa dakbayan sa kampanya.

Kini ang hinungdan nga makig-alayon sila sa kabarangayan aron matukod ang community-based rehabilitation program.

“Ang gisabutan nato nga mag-pilot tag barangay nga atong sugdan ni ang gitawag nga matrix for intervention sa treatment sa atong mga pasyente. Kaning atong mga drug addicts, mga drug dependents ato ning gitan-aw nga health issue,” matud ni Fortuna.

Dunay gipabasa nga mensahe si Mayor Gabriel Luis “Luigi” Quisumbing pinaagi ni Konsehal Demetrio Cortes Jr., ang chairman sa committee on police and penology, nga nagpasalamat sa kapolisan tungod sa iyang tinguha nga mamahimong drug-free city ang Mandaue.

Gipasalig ni Senior Supt. Roberto Alanas, director sa MCPO, ngadto sa mga opisyal sa siyudad nga ang mga polis na ang bahala sa pagpatuman sa balaud labi na ang paggukod sa mga tawong nalambigit sa ilegal nga kalihukan basta motabang lang ang komunidad.

Ang kalihukan nga gipahigayon kagahapon sa Norkis Park gitambungan sa mga representante sa Department of Interior and Local Government, National Police Commission, ug mga surrenderees. (BANAT NEWS)