Mga kaso tanggong, huwes nagnihit

CEBU, Philippines - Ang kakuwang sa mga huwes ug korte ang duha sa mga hinungdan sa kahinay sa pag-irog sa mga kaso hinungdan nga daghan ang mga overstaying nga mga piniriso nga niresulta sa kahuot karon sa mga prisohan.

Si Supreme Court Administrator Jose Midas Marquez nibutyag nga nihimo sila og mga remedial measures sama sa korte sa Dakbayan sa Sugbo gihimo nga assisting court sa Dakbayan sa Lapu-Lapu ug Mandaue.

Ang Dakbayan sa Mandaue ug Lapu-Lapu duna lay tag-tulo ka sala sa Regional Trial Court (RTC).

Ang mga kaso nga gipasaka sa RTC sa Mandaue ug Lapu-Lapu ang husayon sa korte sa Dakbayan sa Sugbo diin adunay 22 ka RTC.

Gibutyag ni Marquez nga dunay gitukod nga mga bag-ong korte sa Lapu-Lapu ug Mandaue apan gi-organize pa nila kini karon.

Ang average nga kaso karon nga gihuptan sa matag RTC branch sa Dakbayan sa Lapu-Lapu ug Mandaue niabot na sa kapin sa 2,000 nga unta tag 300 lang ka kaso ang kapasidad.

Giangkon usab ni Marquez nga dili sayon ang pagkuha og huwes.

Ang proseso sa pagkuha og huwes magsugod sa appointment ug ang pag-appoint og huwes moagi kini sa Judicial and Bar Council nga maoy mo-screen sa mga aplikante ug ang mga napili irekomendar pa kini ngadto sa presidente sa nasud.

Dugang ni Marquez nga higpit kaayo ang pagpili og huwes ug karon wala pa silay short list sa mga napili.

Ang mga mapiling huwes dili pa dayon maka -function tungod kay mangita pa kini og mga staff ug nagkinahanglan usab siya og korte. (BANAT NEWS)