Good governance gitudlo sa mga coop
CEBU, Philippines - Gipaubos sa mandatory training ang mga kooperatiba sa Lungsod sa San Remigio ug mga silingang lungsod sa amihanang bahin sa Probinsiya sa Sugbo.
Niabot sa 28 ka kooperatiba ang niapil sa duha ka adlaw nga kalihukan nga gisuportahan sa Cooperative Development Authority (CDA), kagamhanan sa Lungsod sa San Remigio ug National Confederation of Cooperatives (NATCCO).
Ang maong kalihukan giapilan sa 185 ka opisyal sa nagkalain-laing mga kooperatiba sa mga Lungsod sa San Remegio, Daanbantayan, Medellin, Tabogon, Tabuelan ug Dakbayan sa Bogo.
Si Herculene Rizon, Capitol consultant on cooperatives, nagkanayon nga tumong sa kagamhanan sa probinsiya ang pagpalig-on sa mga kooperatiba pinaagi sa pagtudlo kanila sa good governance.
Ang common goal sa kooperatiba mao ang pagpalambo sa organisasyon aron mouswag sa ilang panginabuhi ang mga marginalized sector ug mga kabus.
Lakip sa nitambong sa kalihukan ang mga kooperatiba gikan sa agrikultura, credit, service, multipurpose, mananagat, ug uban pang sektor.
Mga gihisgutan ang mga balaud sa kooperatiba ug mga polisiya ingon man ang management ug strategies nga makapalambo sa programa sa small, micro ug medium enterprise.
Si Gerry Oraña, training officer sa NATCCO ug Reynaldo Gandionco, general manager sa Fairchild Multipurpose Cooperative maoy mga speakers sa kalihukan. (BANAT NEWS)
- Latest
