Inayawan landfill padayon bisan may kaso

CEBU, Philippines - Padayunon gihapon og gamit sa Siyudad sa Sugbo ang landfill sa Inayawan bisan og dunay kasong giatubang si Mayor Tomas Osmeña.

Matud ni Osmeña nga adunay pinansyal ug politikal nga motibo ang gipasaka ni Konsehal Joel Garganera nga Petisyon for Writ of Kalikasan aron mahunong ang paggamit sa landfill tungod sa giingong kadaut niini sa mga residente nga nagpuyo duol sa labayanan.

“Sa tinuod lang, naay mga tawo nga nakakwarta sa transaction. The city was paying P700 a ton as tipping fee kun molabay ta sa Consolacion. And the city is also paying P1,500 a ton to a private hauler who does not even own a garbage truck,” sigun ni Osmeña.

Iyang gisaway ang niaging administrasyon sanglit dunay nakakwarta sa transaction niini sa usa ka private hauler ug sa tag-iya sa private landfill sa Consolacion.

Gihunong ang operasyon sa Inayawan landfill niadtong Enero 2015 apan giablihan kini og balik niadtong Hulyo 28.

Matud ni Osmeña nga dili makapahunong ang kaso sa iyang paggamit sa landfill tungod kay mao kini ang pamaagi nga makadaginot ang siyudad.

“I will not allow other people to steal the money of the city,” matud niya.

Sa laing bahin, matud ni Garganera nga nakasabot siya nga wala nay laing rason nga mahatag ang mayor sa paggamit sa landfill.

Dugang niya nga nasubo siya tungod kay walay pagtagad ang mayor sa kinaiyahan, panglawas ug kaluwasan sa mga residente, mga patigayon ug mga indibidwal nga apektado sa paggamit sa landfill. (BANAT NEWS)