Emergency responders gipaubos sa training

CEBU, Philippines - Gipaubos sa training kabahin sa pagtubag sa emerhensiya ang mga emergency, medical ug communication responders gikan sa nagkalain-laing lokal nga kagamhanan ug mga volunteer groups sa probinsiya. Nikabat sa 600 ka responders ang niapil sa duha ka adlaw nga Responders General Assembly and Conference sa nilabay’ng semana nga gipahigayon sa Girls Scout Camp, Camp Marina, Capitol Hills, Dakbayan sa Sugbo.

Ang Cebu Provincial Disaster Risk Reduction and Management Office (PDRRMO) maoy nag-organized ug nag-host sa maong kalihukan.

Tumong sa maong kalihukan ang pagbinayloay og mga good practices tali sa mga lokal nga kagamhanan sa pagtubag sa emerhensiya ug search and rescue ug usab sa pag-review ug pag-finalize sa response ug communication protocol sa probinsiya.

Lakip sa maong kalihukan ang pagpaubos sa responders sa basic ug advance rope rescue clinics ug teambuilding.

Ang Philippine Army Bomb Squad nipahigayon usab og orientation kabahin sa bombs and explosives.

Ang League of Local Disaster Officers sa Sugbo nag-convene usab sa pag-review ug pag-finalize sa communication protocol sa probinsiya ubos sa tabang ni National Telecommunications Commission (NTC)-7 Director Jesus Laureno ug sa radio communicators sa Ham Radio Cebu, Inc. (HRC), Cebu Amateur Radio League (CARL) ug Auxiliary Communicators for Emergency Response, Inc. (ACER).

Si Laureno nagkanayon nga ang NTC-7 mo-assign og radio frequency sa mga Local Disaster Risk Reduction and Management Office (LDRRMO) aron sila maka-communicate ug maka-share og mga impormasyon. (BANAT NEWS)