Pugante sa CPDRC nadakpan pagbalik

CEBU, Philippines - Niikyas nga priso sa Cebu Provincial Detention and Rehabilitation Center (CPDRC) nadakpan na pagbalik ug gipaslak na karon sa prisohan.

Ang nadakpan pagbalik mao si Arnel Mait didto sa Sitio Dagundong, Barangay Tigbon, Calatrava, Negros Occidental.

Nadakpan siya sa mga sakop sa Provincial Intelligence Branch (PIB) ug  Provincial Public Safety Company (PPSC) sa Cebu Provincial Police Office (CPPO) ug mga sakop sa 62nd Infantry Battalion, 31D, Philippine Army.

Si Mait, 36-anyos, residente sa Lungsod sa Argao napriso tungod sa kaso sa ilegal nga drugas.

Nakaeskapo kini niadtong Hulyo 25, 2016 human nagpatuo nga usa siya ka dalaw nga padung na mogawas.

Si Superintendent Mario Bauiran Jr., sa Cebu Provincial Police Office nagkanayon nga wala nila hunongi ang pagpangita kang Mait inabagan sa ubang mga law enforcement units sa mga dapit diin kini posibleng nagtago.

Matud ni Bauiran wala makaugpo si Mait tungod kay nalibotan na nilang daan ang gipuy-an niini nga nahimutang sa bukirong barangay.

“He (Mait) thought he cannot be track down,” matud pang Bauiran kinsa midugang nga ang pag-eskapo sa suspek nakapasamot hinuon sa iyang kaso. 

Giangkon ni Mait nga nigamit siya og identification card sa usa sa mga bisita nga gitunol kaniya sa usa sa iyang mga kaubang priso.

Ang maong ID matud pa dugay nang napunitan sa usa nila ka kauban apan wala niya kini giuli, wala usab mobutyag si Mait sa pangalan sa maong priso.

Sumala pa nga si Mait wala mahimuyo sud sa prisohan tungod sa pagduda niining adunay laing karelasyon iyang asawa, butang nga gihimakak sa babaye.

“May time nga sige ko’g ingon nga ang akong asawa nagbinuang gyud. Mao to gihatag ang ID mao nakagawas ko,” matud niya kinsa miingon nga naluoy kaniya iyang mga kauban kay iyaha man pabasahon sa mga suwat sa asawa kaniya.

Sumala pa niini, nabasahan usab niya ang mga text messages sa iyang asawa ug dunay mga text didto sa jailguard nga nanguyab niini.

Tungod niini, nagrigor og maayo ang iyang hunahuna maong nieskapo siya. Sumala pa niya, drug user ra siya apan bisan kanus-a wala gyud siya namaligya niini.

Si Mait maoy hinungdan kun nganong gisuspenso ang tanang dalaw sa CPDRC sugod niadtong Agosto 9 apan niadtong Septiyembre 1 gipabalik kini ni  Gov. Hilario Davide III.

Ang mga kaubang inmates ni Mait nanghunaw og kalambigitan sa pag-ikyas niini ug nagtampo-tampo og P30 mil aron ipuno sa ganti madakpan kini pagbalik. (BANAT NEWS)