Drugbust 1 patay

CEBU, Philippines - Usa patay, usa ang samdan sa buwag nga pagpangronda sa kapulisan niadtong Biyernes sa Dakbayan sa Toledo ug sa Bogo.

Si Ronie Cabaries, residente sa Sitio Cepress, Brgy. Dumlog, Toledo City, napatay sa mga sakop sa Toledo City Police Station niadtong Biyernes sa hapon human gikatahong mibunot sa iyang armas dihang kini dakpon unta sa mga polis tungod sa pagbaligya niini og drugas.

Matud ni Police Officer 2 Joselito Genon  gipalitan sa poseur buyer og P200 nga shabu ang suspek apan human niini natunol ang drugas namatikdan ni Cabaries nga polis iyang kasabot hinungdan nga mibunot kini sa iyang.38 caliber revolver ug gipusil ang polis, apan gidemalas kay wala kini makabuto.

Kini maoy hinungdan nga mibawos ang kapulisan sa pagpusil kaniya, dali siyang gidala sa tambalanan apan namatay gyud kini. Si Cabaries, usa sa mga natala sa watch list sa illegal drugs sa Toledo City Police Station. Nakuha gikan sa suspek ang daghang pinaketeng shabu nga mitimbang og 5.33 gramos nga gibanabanang nagkantidad og P35 mil; drugs paraphernalia, wallet,.38 caliber revolver, mga bala  ug ang P200 buy-bust money. Samtang sa Bogo City, naangol ang usa ka Ernesto Constantino, Jr., alias Badi, residente sa Brgy. Sambag sa maong siyudad dihang kini napusilan sa mga sakop sa Bogo City Police Station.

Matud pa nga nibunot unta og armas ang suspek human sa gipahigayon nga buy-bust operation apan naunhan kini pagpusil sa mga operatiba.

Gawas kaniya, nadakpan ang iyang kauban nga si Darwin Pacumio kinsa giingong diha sa crime scene pagkahitabo. Nakuha gikan sa mga suspek ang daghang paketeng shabu, marijuana sticks, .357 Magnum Revolver ug mga bala niini. (BANAT NEWS)