Mga magtutudlo nangayo og P2k COLA
CEBU, Philippines - Nihangyo ang Alliance of Concerned Teachers (ACT) Cebu City Chapter nga mopasar og ordinansa ang konseho sa siyudad nga maghatag og tag P2,000 nga cost of living allowance matag buwan sa mga magtutudlo.
Ang presidente sa grupo nga si Antonia Lim nisuwat kang Konsehal Margarita Osmeña aron mahan-ay ang ordinansa.
Adunay 2,200 ka pangpublikong magtutudlo nga naghuwat sa maong ayuda sa siyudad.
Nakahatag na sa una og COLA ang Siyudad sa Sugbo ngadto sa mga maestra apan ang Commission on Audit nag-isyu og notice of disallowance sa paggamit sa P80 milyones nga gikuha sa Special Education Fund sa siyudad.
Tungod niini, nisugyot ang ACT nga pwedeng makuha ang budget sa General Funds ug dili sa Special Education Fund. Sigun ni Lim nga kuwang ang sweldo sa mga magtutudlo nga magsugod sa P18,549 sa Salary Grade 11.
Gani, matud niya nga ang additional nga P2,000 sa ilang sweldo makatabang kini tungod sa ka mahal na sa palitonon karon.
Sa iyang bahin, matud ni Osmeña nga wala pa siya kabasa sa letter request sa mga magtutudlo. Si Osmeña ang deputy mayor for budget and finance sa siyudad.
Dugang niya nga iyang tun-an ang proposal sa mga maestra ug mamahimong mohatag ang siyudad kun duna kini pundo. (BANAT NEWS)
- Latest
