Ciudad Project banhawon ni Davide
CEBU, Philippines - Makigtagbo sunod semana si Gobernador Hilario Davide III ngadto kang Cebu City Mayor Tomas Osmeña aron i-presentar ang Memorandum of Agreement nga gi-draft sa Kapitolyo alang sa 93-1.
Ang isyu sa 93-1 parehong gisaad nilang Davide ug Osmeña nga sulbaron sulod sa 60 ka adlaw nga natapos kagahapon.
Matud sa gobernador nga makighinabi siya sa mayor kabahin sa overdue na nga issue sa 93-1.
Inisyal nga nahimong kasabotan sa Kapitolyo ug sa Cebu City Hall mao ang land swap, diin ibaylo sa dakbayan ang usa ka luna niini diha sa SRP, sa north reclamation area ug sa Cebu Zoo. Muabot ngadto sa upat ka hektaryang luna ang ibaylo sa siyudad sa luna nga gipanag-iya sa Kapitolyo kun diin nagpuyo ang kapin singko mil ka mga beneficiaries sa 93-1.
Lakip nga tukion ni Davide ngadto kang Osmeña mao ang natanggong nga Ciudad Project.
“Wala mana naapil sa among agreement pero that can be an issue between the city and the province. I will talk it up to him also” matud ni Davide.
Si Osmeña nagkanayon nga iyang awhagon si Davide nga dili idayon ang Ciudad project nga anaa sa Brgy. Apas kay sumala sa mayor makadala kini’g problema sa trapiko.
Si Davide una nang nagtinguha nga madayon ang maong proyekto ug nanghinaot nga masugdan na kini karon sa iyang ikaduhang termino. (BANAT NEWS)
- Latest
