Mga armas sa CH gibalik na sa CCPO

CEBU, Philippines - Anam-anam na nga gibalik sa kagamhanan sa Dakbayan sa Sugbo ang mga armas nga giisyu ngadto sa mga sakop sa Cebu City Police Office.

Matud sa pangulo sa General Services Office, Ronaldo Malacora, nga dul-an sa 200 na ka armas ang ilang nabalik sa kapolisan diin ang ilang giuna mao ang 22 ka shot gun, 10 ka M4 armalite rifle gikan sa Special Weapons and Tactics (SWAT) Team, 79 ka short firearms ug laing 60 ka armas.

Gipasabot ni Malacora nga sa wala pa nila gibalik ang mga armas, ilang gisusi kung mga maayo ba kini ug walay problema.

Ang CCPO nagpadala og tawo sa City Hall ug maoy nikuha sa mga armas sa niaging semana ug sa niaging adlaw.

Sa 249 ka armas nga walay lisensiya, 26 niini ang wala ma-turnover ug 11 ang naa sa kapolisan nga wala na masayri kung asa kini.

Matud ni Malacora nga kung mahibaw-an kung asa na ang maong mga polis, ila kining padad-an og suwat aron ipauli ang armas.

Gihulagway ni Malacora nga gamay ra og problema ang mga armas nga na-turnover sa ila ug madala ra kini og ayo ug serviceable ra usab kini. (BANAT NEWS)