May warrant napusilan, kapuyo sikop

CEBU, Philippines - Naangol ang gikatahapang pusher og shabu nga napusilan sa buy-bust operation sa kapolisan ug nadakpan ang kauban sa Sitio Franco, Tindog, Lungsod sa Medellin alas 11 pasado sa buntag sa niaging adlaw.

Si Police Officer 1 Rosano Quiding sa Medellin Police Station niila sa napusilan nga si Francis Mercader, 42, ug ang nadakpan mao ang kapuyo nga si Regie Noynay, 25, kinsa maoy subject sa operasyon.

Matud ni Quiding nga si Noynay ang unang nadakpan human ang poseur buyer ang nagpalit og usa ka paketeng shabu ug dihang migawas si Mercader gikan sa ilang panimalay nisuway unta kini og ibot sa armas apan naunhan kini og pusil sa mga polis.

Naigo sa paa si Mercader ug unang gidala sa Bogo Provincial Hospital apan gibalhin sa Vicente Sotto Memorial Medical Center sa Dakbayan sa Sugbo.

Narekorebor gikan kang Mercader ang 11 ka pakete sa gituohang shabu, usa ka.357 kalibre ug unom ka kabhang sa bala sa .38 kalibre nga armas.

Giingong si Noynay natukhang na ug nitahan na sab sa kapolisan apan si Mercader ang wala nagpakita sa kapolisan.

Matud ni Quiding nga adunay pending arrest warrant si Mercader. (BANAT NEWS)