Pagdumala sa CPDRC gisaway ni Gwen

CEBU, Philippines - Gihulagway ni Deputy House Speaker Gwendolyn Garcia nga nahimo na karon nga drug den ang Cebu Provincial Detention and Rehabilitation Center nga kanhi naila lukop kalibutan dihang siya pa ang gobernador tungod sa dancing inmates.

Kini  atol sa privilege speech ni Garcia sa hawanan sa Ubos Bay-Balauranan kagahapon. 

“The home of our famous inmates has become a drug den. One of the inmates was even found in a compound just outside the CPDRC with drugs, debit cards, and cash,” butyag ni Garcia.

Matud ni Garcia nga usa ka dakung tiaw ang pagkalakip ni Gobernador Hilario Davide III sa “honor list” sa 10 ka gobernador kinsa giingong hugtanong nagpahigayon sa kampaniya batok sa ginadiling drugas.

“The irony of ironies is we now find Governor Davide in the DILG’s ‘honor list’ of 10 governors to be cited for stemming the illegal drug trade in their respective provinces. As his misspelled name says on the list, it’s a ‘Hilarious’ turn of events. But for many, his misspelled name is not the only mistake on that list,” dugang ni Garcia.

Giklaro ni Garcia nga sa unang tulo ka tuig nga termino ni Davide, wala siya nisaway niini bisan dili sila kaalyado sa politika hangtud sa nahitabo karon sa CPDRC nga gikan sa pagka-inila ug karon nahimong ngil-ad ang kadungganan.

Si Garcia niduso og resolusyon nga nanawagan alang sa imbestigasyon sa dili maayong pagkadumala sa kasamtangang administrasyon sa CPDRC.

Gani ang Committee on Discipline and Investigation (CODI) padayon pa sa ilang imbestigasyon batok sa mga jail guards sa CPDRC nga giingong dunay kalambigitan sa anomaliya sa prisohan.

Ang pangulo sa CODI, Provincial Attorney Orvi Ortega, nibutyag nga gi-imbestigar ang tulo ka jail guards diin duha niini giingong dunay kalambigitan sa pag-eskapo sa usa ka piniriso ug ang laing usa kinsa babaye nga jail guard giingong dunay kalambigitan sa pagpa-abang og cellphone sa mga piniriso aron makatawag sa gawas.

Ang kanhi consultant sa CPDRC, Marco Toral, gihatagan sab og 10 ka adlaw nga makaduso og mga dokumento nga makapalig-on sa reklamo batok sa babayeng jail guard aron masusi kung duna bay sukaranan ang pormal nga pagpasaka sa reklamo.

Ang maong babaye nga jail guard nihimakak sa mga pasangil batok kaniya samtang ang mga lalaking jail guards gihuwat pa ang ilang written explanation sa CODI.

Samtang ang pagpabisita sa CPDRC gikatakdang ibalik na karong Lunes, matud ni Davide.

Tungod sa mga kontrabando nga nakasulod sa CPDRC ug pag-ikyas sa usa ka piniriso gisuspenso una ang dalaw sa mga piniriso.

Matud ni Davide nga ang nasabutan tali sa Task Force CPDRC nga i-cluster ang mga selda sa CPDRC aron dili magdungan ang dalaw ug dili mosamot ang kahuot.

Ang mga dalaw duna nay lugar kung asa sila dapita magtagbo ug sulod lang sa 30 minutos ang ilang pagbisita.

Ang mga dalaw ipaubos sab sa inspection sa ilang pagsulod ug gawas sa prisohan.

Gipasabot ni Davide nga tumong niini nga wala nay mga kontrabando nga makasulod sa prisohan.

Kaniadto ang adlaw sa dalaw mao ang Sabado ug Domingo ug magdungan kini hinungdan nga maghuot ug lisud na usab nga i-monitor ang mosulod ug gawas. (BANAT NEWS)