Seaman, laing 2 patay sa pagpamusil

CEBU, Philippines - Patay diha-diha ang 24-anyos nga seaman human kini naalaan sa iyang nakaaway sa dalan Mabini, San Roque, Dakbayan sa Sugbo pasado alas 2 sa nakalabay nga kaadlawon.

Giila ang biktima nga si Kim Anthony Branzuela, ulitawo, lumad nga taga Sta. Cruz, Mahayag, Zamboanga del Sur, samtang ang suspek giila nga si Geruncio Morales, hingkod, taga Upper Quiot, Pardo, kinsa napatay sab sa mga sakop sa Special Weapons and Tactics (SWAT) Team sa Cebu City Police Office.

Matud ni Police Officer 3 Winston Ybañez, imbestigador sa CCPO-Homicide Section, nga unang nakakita og away si Morales sa maong dapit diin kini nagtagay.

Human nalupig sa sinukmagay niuli kini sa iyang gipuy-an ug nibalik nga nagdala og armas.

Ang biktima nga nagpalit og barbecue nga nagtalikod maoy naalaan sa suspek nga maoy iyang kontra ug iya giduol dayon pusil sa ulo.

Si Ybañez niingon nga si Branzuela naabot sa Sugbo duha ka semana na ang nakalabay aron pag-asikaso sa iyang papeles paingon sa gawas sa nasud isip usa ka seaman.

Ang mga sakop sa Police Station 3 ug SWAT dali nga niresponde  hangtud nga napusilan patay ang suspek human kini nisukol dihang suway nga gidakop sulod sa iyang gipuy-an.

Ang kapuyo ni Morales nga si Myra Caño nitug-an nga iyang gitambagan si Morales nga dili mogawas ug dili mobawos apan wala kini nipatuo kaniya.

Samtang usa sab ang patay ug usa ang naangol human gipamusil sa tulo ka lalaki nga nag–bonnet ang duha ka managhigala sa Lawis, Pasil, Dakbayan sa Sugbo pasado alas 12 sa nakalabay nga kadlawon.

Natusak-tusak sa bala ang lawas ni Benjamin Decatoria, hingkod, taga Camp Lapu-Lapu, Apas, samtang naigo sab sa tiyan ang iyang kauban nga si Ronald Publica, 27, taga Dakbayan sa Mandaue.

Personal ang gitan-aw nga motibo sa mga sakop sa homicide section sa CCPO.

Nasayran nga samtang paingon na unta mosakay sa motorsiklo ang mga biktima kalit lang naabot ang tulo ka lalaki nga nag-bonnet dayon pusil sa makadaghan nga higayon ni Decatoria.

Si Publica nakaangkon sab og samad pinusilan sa tiyan human nilapos ang bala gikan sa iyang kauban.

Sa crime scene narekober sa mga polis ang pito ka basiyo sa bala sa .45 caliber pistol.

Matud ni Ybanez nga ilang nasayran gikan kang Publica nga naghatud og pasahero sa maong lugar si Decatoria apan laing kasayuran nga ilang nakuha sa lugar mao nga gikan nanuyop   ang duha dayon gibirahan sa ilang pagpamauli. (BANAT NEWS)