Welder natabonan

CEBU, Philippines - Patay ang 20-anyos nga welder human gikatahong nahugmakan ug natabonan sa gitukod nga retaining wall sa gikubkob nga yuta sa usa ka construction site diha sa dalan Salvador Extension, Brgy. Labangon  ning Siyudad sa Sugbo kagahapon sa buntag.

Ang trabahador nga namatay mao si John Eric Llera, lumad nga taga Brgy. Canlumampao, sa Dakbayan saToledo.

Base sa inisyal nga pakisusi sa Homicide Section sa Cebu City Police Office (CCPO) adunay gitrabaho sa ubos nga bahin si Llera dihang kalit kining nahugnoan sa maong retaining wall.

Matud ni Police Officer 3 Cristobal Geronimo nadat-ugan si Llera sa mga steel bars ug yuta nga maoy hinungdan sa iyahang kamatayon.  Ang barangay tanod sa maong lugar nga si Jose Wesley Cellona miingon nga dunay mipahibalo kanila nga nahugno ang paril sa maong construction site maong dali nila kining gisusi.

Matud pa niini, naabtan nila ang usa ka lalake nga gihigtan og pisi ang hawak nga gibira pasaka sa backhoe ug daling gikarga sa ambulansiya.

Tungod sa kahigpit sa management sa maong construction site nga gitrabaho sa J.E. Abraham C. Lee Construction & Development Incorporated diin ang project engineer mao si Adonis Gabutin wa dayoy  nakasulod nga mga otoridad ug rescuers sa site.

Miadto usab sa nahitaboan si Cebu City Councilor Jerry Guardo kinsa maoy chairman sa Committee on Infrastructure ug kini nagkanayon nga way napakitang excavation permit ang project engineer kay matud pa ilaha pa kining giproseso sa  Office of the Building Officials (OBO).

Gawas sa maong paril, natumba usab ang usa ka poste nga gituohang iya sa usa ka telecommunication company samtang giharag na usab ang poste sa VECO sa lugar maong giawhag ni Guardo ang kontraktor nga pangitaan kini og paagi aron di mahasol ang mga residente sa lugar.

Si Vice Mayor Edgardo Labella tuyong miadto sa dapit apan sama sa ubang nauna kaniya nga mga otoridad wala dayon siya pasudla sa babayeng gwardiya hinungdan nga migamit siya og megaphone aron manawagan sa mga tawo diha sa sud.

Pasado alas-2 na siya gipasud ug ang mga polis uban sa mga rescuers sa City Disaster Risk Reduction Management Office, kabomberohan, ug taga OBO nga mo-imbestigar sa kamatayon sa trabahador ug sa kinatibuk-ang sitwasyon sa site.

Si Engr. Jeralyn Mae Lucero, representante sa OBO nitug-an nga adunay demolition permit ang kontraktor apan wala silay excavation ug building permit base sa rekord sa ilang buhatan.

Sumala pa sa OBO huyang ug humok ang yuta sa maong dapit nga gituohang maoy hinungdan sa pagkahugno sa paril.

Tungod niini, gimando ni Labella ang paghunong una sa pagpatrabaho sa lugar hangtud nga masigurong luwas kining trabahoan ug gimando usab niyang dili una paagian ang gamay’ng dalan kilid sa construction site aron dili mauyog ang lugar.

Matud pa ni Labella ang engineer sa maong proyekto wala dayon mopasud kanila tungod sa kabalakang daghang tawo ang modugok sa sud ug adunay mahitabong laing disgrasya.

Gimando karon ni Labella  nga paimbestigaran ang maong hitabo tungod sa nakalas nga trabahante ug gimandoan ang mga tagdumala sa maong construction site pagduso og incident report ug moesplikar sa hitabo.

Nakig-alayon  na usab ang kapulisan sa OBO aron pagsuta kun unsay kalapasan sa construction firm aron maoy ilang basehan sa posibleng kaso nga  ipasaka.

Ang kontraktor ug ang developer nga Cebu Landmasters, Inc. mipadala og official statement sa Banat News ug miklaro nga wala pay building nga gitukod sa lugar.

Matud sa pamahayag,  ang gihimo karon mao ang pag-demolis sa karaang building  nga apil pa sa ilang demolition permit.

Ang pagkubkob sa lugar ug pagbutang og retaining wall gamit ang sheet piles aron di modahili ang yuta dugang sa pamahayag.

Giklaro usab nila nga naguol sila sa nahitabo sa trabahador ug wala damha nga mahitabo kini. Misaad sila nga ilang tabangan ang pamilya sa nakalas hangtud sa pagdala sa lawas niini balik sa Toledo City. (BANAT NEWS)