Gambling machines, marijuana nasakmit sa ‘Tukhang’

CEBU, Philippines - Naimbargo sa kapolisan ang 13 ka ilegal nga makina sa sugal atol sa Oplan Tukhang sa Barangay Tanke, Dakbayan sa Talisay sa niaging gabii.

Sila si Supt. Aileen Recla, hepe sa Talisay City Police Station, ug mga kaubanan nihimo sa operasyon sa lugar nga iyang gihulagway nga tinubdan sa ilegal nga drugas sa siyudad.

Ilang natuktok ang 30 ka balay nga gikaingon nga nalambigit sa ginadiling drugas ug gihangyo nga motahan sa ilang kaugalingon ug mosaad nga mobiya na sa matang sa negosyo.

Sa ilang pagsuroy-suroy sa suoton nga lugar, 13 ka ilegal nga makina sa sugal ang ilang nalabyan ug ilang gihapit og hipos nga naglakip sa lima ka video karera ug walo ka mole-mole machines.

Sa laing bahin tulo ka tawo ang nasikop sa buy-bust operation sa kapolisan sa Dakbayan sa Talisay sa Siloy Compound, Barangay San Isidro niadtong Lunes sa gabii.

Ang target sa kapolisan mao si Haiet Mendoza, 37, kinsa giilang tigpayuhot og marijuana sa nahisgutang lugar.

Lakip sa nasikop ang kapuyo nga si Jason Amiñon, hingkod, ug ang manuyupay nga si Darren Niño Ata Davis, 19, ulitawo nga taga sitio Ilang-Ilang, Barangay Lagtang.

Nakuhaan og mga marijuana nga giputos og newspaper si Mendoza nga motimbang og 16.9 gramos. Si Mendoza ang nakuhaan sab og marijuana nga motimbang og 325 gramos nga adunay gibana-bana nga kantidad nga P17,875 ug si Davis nakuhaan sab og marijuana nga adunay timbang nga 8 gramos.

Samtang upat ka gituohang pusher og shabu nga nitahan na sa Oplan Tukhang ang nadakpan sa managlahing buy-bust operation sa mga sakop sa Mandaue City Police Office.

Alas 10 pasado kagahapon sa buntag nadakpan si Jovannie Colina, 40, ug Sudelyn Paracuellas, 25, dalaga, nagpuyo sa CCF Housing, Purok Tambis, Barangay Umapad.

Nakuha gikan sa mga nadakpan ang upat ka paketeng shabu ug P200 nga marked money.

Ang laing buy-bust operation sa Barangay Cambaro sa alas 4 pasado sa niaging kadlawon nasikop si Richard Guevarra Pasano, 38, ug kauban niini nga si Raul Pilapil Pepito, 40, nagpuyo sa maong dapit.

Nakuha gikan sa mga dinakpan ang tulo ka medium-size nga shabu ug P500 nga marked money. (BANAT NEWS)