Crame nihatag og sakyanan, armas sa CCPO
CEBU, Philippines - Lima ka bag-ong patrol cars ug 10 ka M4 rifles ang nadawat sa Cebu City Police Office gikan sa Camp Crame.
Si Police Regional Office-7 Director Noli Taliño niingon nga ang lima ka Mahindra police patrol cars makatabang kini sa hugot nga kampanya batok sa drugas ug kriminalidad.
Duna pay dugang sakyanan nga moabot alang sa CCPO, matud ni Taliño.
Gidawat sab sa mga sakop sa Special Weapons and Tactics (SWAT) Team sa CCPO ang mga M4 carbine rifles nga may 30 ka magazines ug kapin 3,000 ka bala.
Apan si Senior Police Officer 4 Victorio Durante, sakop sa SWAT Team sa CCPO, niingon nga gawas sa armas, nagkinahanglan sab sila karon og sakyanan.
Atol sa turnover ceremony kagahapon sa buntag, gihatagan sab og pasidungog ang tulo ka polis nga sila si Police Officer 1 Jilbert Cabajar, sakop sa Regional Public Safety Battalion-7, ug sila si PO1 Ronnie Genardino ug PO1 Roger Bejer.
Si Cabajar ang nakaresponde sa pagpanulis sa usa ka manager sa tindahan sa downtown area sa Dakbayan sa Sugbo diin usa sa mga suspek ang napatay.
Sila si Genardino ug Bejer mao sab ang nakadakop sa duha ka lalaki nga nakuhaan og armas ug drugas dihang kini unang gipara sa usa ka babaye nga traffic enforcer gumikan sa traffic violation. Ang tulo ka polis pulos gihatagan og Medalya ng Kagalingan. (BANAT NEWS)
- Latest
