Panginabuhian sa ‘surrenderees’ tukion ni PA Dino

CEBU, Philippines - Makigtagbo si Presidential Assistance for the Visayas Michael Lloyd Dino sa kadagkuan sa Police Regional Office-7, Department of Labor and Employment ug ubang ahensiya karong adlawa aron tukion ang paghatag og panginabuhian sa mga ni-surrender sa Oplan Tukhang sa kapolisan.

Matud ni Dino nga tuyo niini nga mapatuman dayon ang dinalian nga solusyon nga dili na mobalik sa ilang pagpaninda ug pagpakiglambigit sa ilegal nga drugas ang mga nitahan samtang magpaabot sa malungtaron nga solusyon.

Lakip sa gitan-aw nga solusyon ang paghatag og panginabuhian sama sa pagpanglimpyo sa kasapaan, kadagatan ug kadalanan.

Gibutyag usab ni Dino nga ilang susihon ang Fazenda Da Esperanza sa Masbate aron makakuha sila og ideya alang sa rehabilitation program sa mga nitahan.

Makigtagbo usab siya kang retired police general Tiburcio Fusillero kinsa adunay 50 ka ektarya nga luna sa Barangay Cantipla, Dakbayan sa Sugbo nga planong tukuran sa rehabilitation center. (BANAT NEWS)