Unom ginominar para RDC-7 chair

CEBU, Philippines - Nipili og unom ka nominado ang Regional Development Council sa Central Visayas aron pilian isip chairman ug co-chairman ni Presidente Rodrigo Duterte.

Apil sa na-nominate si Gobernador Hilario Davide III sa Probinsya sa Sugbo, Gob. Edgar Chatto sa Bohol, Gobernador Zaldy Villa sa Siquijor samtang gikan sa pribadong sektor sila si Kenneth Cobonpue, usa ka iladong furniture designer; William Liu Jr. ug si Argeo Melisimo nga taga Bohol.

Ang RDC maghuwat hangtud sa Septiyembre 23 nga aduna nay appointment si Duterte kung kinsa ang chairman aron aduna nay mo-preside sa full council meeting.

Ang RDC gilangkuban sa tulo ka gobernador sa Central Visayas, mga mayor sa siyudad, pangulo sa League of Municipalities of the Philippines, mga directors sa mga nasudnong ahensiya sa kagamhanan sa rehiyon, ug representate sa mga piniling non-governmental organizations nga maoy moduso sa dagkung proyekto ngadto sa National Economic Development Authority alang sa pag-aprobar sa Presidente. (BANAT NEWS)