Barangay, SK Elections isibog sunod tuig
CEBU, Philippines - Dako na gyud ang kahigayonan nga masibog sa tuig 2017 ang Barangay ug Sangguniang Kabataan (SK) elections human ang Kongreso nagkauyonay nga ioktaba kini ug himuon na lang sa Oktubre 23 sunod tuig inay karong Oktubre 31.
Atol sa caucus sa House kagahapon si Majority Floor Leader Rodolfo Fariñas miingon nga moduso sila og bill aron ma-postpone ang eleksyon samtang ang Senado mipadayag usab nga moduso sila og susamang balaudnon.
“Dapat resolution lang [ang ipa-file] but since the Senate is filing a bill, we’ll file a bill also with the aim in view of avoiding a bicameral conference committee,” matud pang Fariñas sa report sa GMA Network.com.
Sumala pa niya ang Senado gusto unta nga himuon ang eleksyon sa kataposang adlaw nga Lunes sa Oktubre 2017 apan ang mga senador ubos sa committee on suffrage pinangulohan ni Senador Juan Edgardo Angara nipabor sa sugyot sa Ubos Balaybalauranan nga himuon kini Oktubre 23 kay ang Oktubre 30 duol kaayo sa All Saints’ Day.
Matud pa ni Fariñas posibleng maaprubahan dayon ang postponement sa eleksyon gikan sa second reading sa House karong Septiyembre 5 o sa petsa 6 ug isunod dayon ang third and final reading sa Septiyembre 12.
Daan nang nipadayag ang Commission on Elections (Comelec) nga uyon kini sa pagsibog sa piniliay sa SK ug barangay tungod kay bag-o lang nag-eleksyon niadtong Mayo karong tuiga.
Bisan si Presidente Rodrigo Duterte mipadayag og pag-uyon sa pagsibog sa maong eleksyon. Gikan sa wires (BANAT NEWS)
- Latest
